سياسة الخصوصية وش نحفظ من بياناتكم، وليش، وكيف تتحكمون فيه

بيانات الحساب

• الاسم والإيميل.
• كلمة السر كبصمة مشفّرة مع ملح (scrypt). النص نفسه ما ينحفظ، وما نقدر نقراه.
• اختياري، وتضيفونه من «ملفي»: صورة شخصية صغيرة، رقم الجوال، والدولة.
• تاريخ إنشاء الحساب، وآخر مرة دخلتوا، وعدد الألعاب اللي لعبتوها.

الدخول بـ Google: لو اخترتوه ناخذ من Google اسمكم وإيميلكم بس. كلمة سر Google ما توصلنا.

بيانات اللعب

• سجل الألعاب اللي خلصت: نوع اللعبة، الفئات، أسماء الفرق أو اللاعبين ونقاطهم، الفايز، المدة، والتاريخ. تشوفونه في «ملفي».
• دفتر اللي انلعب على حسابكم: أي أسئلة انلعبت من كل فئة في الكبّة، وأي أسئلة وكلمات طلعت لكم في ألعاب السهرة، عشان المحتوى ما يتكرر عليكم مهما غيّرتوا الجهاز. ينحفظ كبصمات قصيرة، مو نص الأسئلة.

المشتريات ورصيد الألعاب

• الطلبات: الباقة، المبلغ والعملة، كود الخصم لو استخدمتوه، التاريخ، طريقة الدفع، وحالة الطلب.
• كودات الألعاب اللي أضفتوها، وسجل كل إضافة للرصيد وكل لعبة بدأتوها.

بيانات البطاقات البنكية ما نحفظها. الدفع حالياً يترتّب معنا مباشرة.

إحصائيات الاستخدام

عشان نعرف وش يشتغل ووش يحتاج تحسين، نسجّل أحداث بسيطة: فتح الصفحة، بداية اللعبة ونهايتها، اختيار وضع أو فئة، وتشغيل فيديو الشرح. ومع كل حدث:

• الدولة: نعرفها من الطلب نفسه، وعنوان الـIP ما نخزّنه أبداً.
• نوع الجهاز (جوال، تابلت، كمبيوتر، تلفزيون) والمنصة (المتصفح أو التطبيق).
• معرّف الجلسة كبصمة مشفّرة مع ملح سري، مو المعرّف نفسه.
• رقم حسابكم لو كنتم داخلين.
• مع زيارة الصفحة: الصفحة اللي فتحتوها، والموقع اللي جيتوا منه، ولغة المتصفح، والمنطقة الزمنية.

أحداث اللعب فيها الوضع والفئات وعدد الفرق والمدة، بدون أسماء. وكل الأحداث تنحذف لحالها بعد 400 يوم.

تقارير الأعطال

لو صار خلل في اللعبة على جهازكم، يوصلنا تقرير فيه: رسالة الخطأ ومكانه في الكود، رقم نسخة اللعبة، نوع المتصفح والجهاز، مقاس الشاشة، الشاشة اللي كنتم فيها، ورقم حسابكم لو كنتم داخلين. نستخدمه عشان نصلّح الخلل بس.

حدّ المحاولات

عنوان الـIP نستخدمه لحظياً في ذاكرة السيرفر عشان نوقف المحاولات المتكررة (مثل تخمين كلمات السر)، وما ينكتب في قواعد بياناتنا.

أصحابكم اللي يدخلون من جوالاتهم

اللي يدخل الغرفة بكود الشاشة ما يحتاج حساب: يكتب اسم بس. الغرفة تعيش في ذاكرة السيرفر وقت السهرة، وما تنحفظ بعدها. اللي يبقى هو نتيجة اللعبة (الأسماء والنقاط) في سجل ألعاب صاحب الحساب.

على جهازكم

اللعبة تحفظ في متصفحكم:

• رمز الدخول، عشان ما تسجّلون دخول كل مرة.
• إعداداتكم، مثل الوضع الفاتح أو الداكن والصوت والثيم، واسمكم في آخر سهرة.
• سجل اللعب على الجهاز، واللعبة اللي ما خلصت عشان تكمّلونها.
• صور الفرق: تبقى على جهازكم وما ترتفع لنا.

تمسحونها أي وقت من إعدادات المتصفح. وما نستخدم كوكيز تتبّع: من عندنا كوكي وحدة مؤقتة (10 دقايق) وقت الدخول بـ Google.

ما نبيع بياناتكم، وما عندنا إعلانات ولا أدوات تتبّع إعلانية. البيانات تمر بس على الخدمات اللي تشغّل اللعبة:

• Zoho Mail: نرسل منه إيميلاتنا، فيمر عليه إيميلكم ونص الرسالة.
• Cloudflare: الموقع يشتغل وراه، ويعالج بيانات الاتصال (مثل عنوان الـIP) للحماية وتوصيل الصفحات.
• Google: بس لو اخترتوا الدخول بـ Google.
• يوتيوب: بعض الأسئلة والكاريوكي تشغّل مقاطع من يوتيوب داخل اللعبة، ووقتها يوتيوب يستلم بيانات الاتصال من جهازكم.

الإيميلات اللي توصلكم

• إيميلات الحدث توصل دايماً: تأكيد الإيميل، دعوة اللعب، إعادة كلمة السر، وإيميلات الطلبات والإيصالات.
• الإيميلات التسويقية (أخبار الإطلاق والتذكيرات): في آخرها رابط «إلغاء الاشتراك»، وضغطة وحدة توقفها.
• نحفظ سجل بالإيميلات اللي أرسلناها (لأي إيميل، وأي رسالة، ومتى) عشان ما تتكرر عليكم.

• الاسم والصورة ورقم الجوال والدولة: عدّلوها من «ملفي».
• الإيميل: اطلبوا تغييره من «ملفي»، والإدارة توافق على الطلب.
• كلمة السر: غيّروها من «ملفي». ولو نسيتوها، «نسيتوا كلمة السر؟» في شاشة الدخول ترسل لكم رابط صالح ساعة.
• حذف الحساب: «ملفي» ← «احذفوا حسابي». ينحذف الحساب والجلسات وسجل الألعاب والرصيد، ومعها تسجيلكم في أهل الكبّة الأولى وفئاتكم اللي ما انتشرت للكل. ما يرجع بعدها.
• اللي يبقى بعد الحذف: سجلات الطلبات المدفوعة (للمحاسبة)، والفئات المنشورة للكل بدون ربط بحسابكم (تبون نشيلها؟ اكتبوا لنا)، وأحداث الإحصائيات كأرقام بدون ربط فيكم.
• الإيميلات التسويقية: وقّفوها من رابط «إلغاء الاشتراك» في آخر أي إيميل منها.
• أي طلب ثاني: تبون نسخة من بياناتكم، أو تصحيحها، أو حذف تسجيلكم من أهل الكبّة الأولى وأنتم بدون حساب؟ اكتبوا لنا على hello@kobbaa.com

أي تغيير على هالسياسة نكتبه في هالصفحة ونحدّث التاريخ اللي فوق.

• عندكم سؤال عن بياناتكم؟ اكتبوا لنا على hello@kobbaa.com
• شروط اللعب في شروط الاستخدام.
• المشتريات في سياسة الاسترجاع.